Hverju lofaði ríkisstjórnin?

Með frumvarpinu er lögð til breyting á 5. mgr. 40. gr. laganna um kirkjugarða, greftrun og líkbrennslu, nr. 36/1993, þess efnis að reikningshald Kirkjugarðasjóðs verði fært f rá skrifstofu biskups til kirkjugarðaráðs, sem bera mun ábyrgð á reikningshaldi sjóðsins og því hvernig haldið er utan um fé hans, eftir atvikum með því að semja við einhvern um að annast fjárreiður sjóðsins með fullnægjandi hætti. Jafnframt verði felld brott tvö ákvæði er snúa að Bálfarar félagi Íslands sem hefur verið lagt niður og ekki starfað í um 60 ár.

Heiti á skránni: Frumvarp til laga um breytingu á lögum um kirkjugarða, greftrun og líkbrennslu, nr. 36/1993 (reikningshald Kirkjugarðasjóðs o.fl.).

Með frumvarpinu er ætlunin að skýra heimildir lögreglu til að grípa til aðgerða í þágu afbrotavarna, einkum hvað varðar afbrot eða athafnir sem raskað geta öryggi borgaranna og ríkisins, afbrot sem tengjast skipulagðri brotastarfsemi og afbrot sem framin eru á netinu. Jafnframt er í frumvarpinu kveðið á um meðferð vopna hjá lögreglu, en ákvæði þess efnis hefur fram til þessa aðeins verið að finna í reglugerð á grundvelli vopnalaga.

Heiti á skránni: Frumvarp til laga um breytingu á lögreglulögum, nr. 90/1996 (aðgerðir til að koma í veg fyrir brot).

Með frumvarpinu eru lagðar til breytingar á lögunum í kjölfar heildarendurskoðunar á lögunum sem ráðist var í veturinn 2021-2022 með hliðsjón af fenginni reynslu eftir heimsfaraldur SARS - CoV-2- veirunnar. Breytingar frá gildandi lögum varða einkum stjórnsýslu sóttvarna, feril ákvarðana um opinberar sóttvarnaráðstafanir og aukna aðkomu Alþingis að þeim.

Heiti á skránni: Frumvarp til sóttvarnalaga.

Með frumvarpinu er lagt til að gerð verði breyting á lögunum til að innleiða tilskipun Evrópuþingsins og ráðsins 2014/40/ESB um samræmingu ákvæða í lögum og stjórnvaldsfyrirmælum aðildarríkjanna varðandi framleiðslu, kynningu og sölu á tóbaki og tengdum vörum og um niðurfellingu á tilskipun 2001/37/EB. Með frumvarpinu er m.a. lagt til að innleiddar verði reglur tilskipunarinnar um umbúðir tóbaksvara, rekjanleika og skráningu þeirra og tilkynningar um nýjar vörur. Jafnframt verður lagt til að innleiddar verði reglur um jurtavörur til reykinga og takmarkanir á einkennandi bragði og tilteknum aukaefnum í tóbaksvörum.

Heiti á skránni: Frumvarp til laga um breytingu á lögum um tóbaksvarnir, nr. 6/2002 (innihaldsefni, rekjanleiki, umbúðir tóbaksvara o.fl.).

Með frumvarpinu er í fyrsta lagi áformað að setja lagastoð fyrir innleiðingu framkvæmdarreglugerðar framkvæmdastjórnarinnar (ESB) 2018/1263 frá 20. september 2018 um eyðublöð fyrir framlagningu upplýsinga frá veitendum bögglaútburðarþjónustu samkvæmt reglugerð Evrópuþingsins og ráðsins (ESB) 2018/644. Í öðru lagi er áformað að breyta 1. málsl.5. mgr. 27. gr. laga um póstþjónustu, nr. 98/2019, í því skyni að greiða fyrir aukinni notkun bréfakassasamstæða. Þá er í þriðja lagi áformað að lagfæra mistök sem urðu við frumvarpsgerð þegar málaflokkurinn var fluttur til Byggðastofnunar en þá láðist að afmá orðið „Póst- og fjarskiptastofnun“ út úr lögunum að fullu.

Heiti á skránni: Frumvarp til laga um breytingu á lögum um póstþjónustu, nr. 98/2019 (úrbætur á póstmarkaði).

Frumvarpinu er ætlað að tryggja lagastoð til innleiðingar tiltekinna EES- gerða sem varða markaðseftirlit og öryggi ökutækja og jafnframt greiða fyrir fullgildingu Íslands á tveimur alþjóðlegum samningum um gerð og búnað ökutækja, gagnkvæma viðurkenningu o.fl.

Heiti á skránni: Frumvarp til laga um breytingu á umferðarlögum, nr. 77/2019 (EES-reglur, ökutæki o.fl.).

Frumvarpið felur í sér heildarendurskoðun á ákvæðum laganna þar sem einkum verður horft til þess að samræma framkvæmd þeirra við framkvæmd á öðrum Norðurlöndum.

Heiti á skránni: Frumvarp til laga um breytingu á lögum um eftirlit með aðgangi barna að kvikmyndum og tölvuleikjum,nr. 62/2006 (heildarendurskoðun).