Endurskoðun almannatryggingakerfisins

Að styrkja samstarf og samhæfingu eftirlits á vinnumarkaði með tilliti til aðgerða gegn brotastarfsemi og félagslegum undirboðum.

Lagt er til að komið verði á laggirnar sérstakri samstarfsnefnd stjórnvalda og samtaka aðila vinnumarkaðarins um aðgerðir gegn brotastarfsemi á vinnumarkaði. Hlutverk hennar verður að móta stefnu og aðgerðaáætlun stjórnvalda gegn slíkri brotastarfsemi. Þá er lagt til að komið verði á fót samstarfsvettvangi opinberra eftirlitsaðila gegn brotastarfsemi á vinnumarkaði undir forystu Vinnueftirlits ríkisins. Samstarfsvettvangnum verður m.a. ætlað að efla og samræma eftirlit með því að allir aðilar á innlendum vinnumarkaði fari að ákvæðum laga, reglugerða og kjarasamninga sem gilda á vinnumarkaði og standa fyrir sameiginlegum aðgerðum gegn brotastarfsemi á vinnumarkaði með eftirliti og virkri eftirfylgni. Enn fremur er lagt til að Vinnueftirlitið fái auknar heimildir til að beita viðurlögum, m.a. í því skyni að gera stofnuninni kleift að bregðast á viðeigandi hátt við alvarlegum brotum gegn ákvæðum laganna, sem geta ógnað öryggi og vellíðan starfsfólks á vinnustöðum. Loks er gert ráð fyrir því að það hlutverk sem Vinnumálastofnun hefur haft samkvæmt lögum hvað varðar eftirlit á vinnumarkaði verði flutt til Vinnueftirlits ríkisins.