Forseti Íslands setur þingið

Að sýna áætlanir um tekjur og gjöld ríkissjóðs fyrir hvert það ár sem í hönd fer og leita heimilda til hvers konar fjárráðstafana, svo sem lántöku og ríkisábyrgða og heimilda til að kaupa og selja fasteignir.

Gert er ráð fyrir að nýtt örorkukerfi taki gildi í september 2025 sem muni leiða til verulegra kjarabóta fyrir örorkulífeyrisþega. Frítekjumark ellilífeyris hækkar um 46% frá ársbyrjun 2025 sem samsvarar kjarabót upp á 138 þúsund kr. á ári. Áhersla verður lögð á inngildingu flóttafólks og innflytjenda og framlög aukin til að stytta málsmeðferðartíma umsókna um alþjóðlega vernd. Í samgöngumálum verða nýframkvæmdir og viðhald á vegakerfinu í forgangi og framlög til uppbyggingar samgönguinnviða og almenningssamgangna á höfuðborgarsvæðinu aukast um 6,4 milljarða kr. Framlög til heilbrigðismála hækka um 10,4 milljarða kr. milli ára á föstu verðlagi. Fjárveitingar til heilbrigðisstofnana og sjúkratrygginga verða hækkaðar og auknu fjármagni varið í rekstur nýrra hjúkrunarrýma. Framlög vegna lyfja og hjálpartækja aukast um 1,3 milljarða kr. og 18,4 milljörðum kr. verður varið til byggingar nýs Landspítala á árinu 2025. Loks verður hafist handa við byggingu nýs fangelsis í stað Litla-Hrauns og undirbúningur Þjóðarhallar hefst.