Sveitarstjórnarlög

Á 133. fundi byggðarráðs sveitarfélagsins Skagafjarðar var tekið fyrir mál 23/2025 til samráðs og þannig bókað. Kynnt áform um fyrirhuguðarar breytingar á 129. grein sveitarstjórnarlaga, sem fjallar um endurskoðun á ferli kostnaðarmats, þ.e. mati á hugsanlegum áhrifum frumvarpa, tillagna að stjórnvaldsfyrirmælum eða annarra stefnumarkandi ákvarðana af hálfu ríkisins á fjárhag sveitarfélaga. Breytingunum er ætlað að koma til móts við gagnrýni sveitarfélaga, m.a. um að dæmi séu um að kostnaðarmat af þessu tagi séu ekki framkvæmd, matið sé oft ekki fullnægjandi, óljóst sé hvenær leita eigi umsagnar Sambands íslenskra sveitarfélaga og hvernig leyst skuli úr ágreiningi. Byggðarráð Skagafjarðar hefur ítrekað bent á skort á kostnaðarmati eða að það sé framkvæmt á ófullnægjandi hátt og fagnar því fyrirhuguðum áformum. F.h. byggðarráðs Sigfús Ingi Sigfússon sveitarstjóri

Sveitarstjórn Þingeyjarsveitar fagnar framkomnu frumvarpi um breytingu á sveitarstjórnarlögum. Sveitarfélögin hafa lengi bent á mikilvægi þess að við lagasetningu sé skýrt ferli varðandi kostnaðarmat, þ.e. mat á hugsanlegum áhrifum frumvarpa, tillagna að stjórnvaldsfyrirmælum eða annarra stefnumarkandi ákvarðana af hálfu ríkisins á fjárhag sveitarfélaga. Ekki verður ráðið af framlögðum drögum hvaða afleiðingar það hafi sé ekki orðið við þeirri skyldu að fram fari kostnaðarmat, þ.e. hvaða úrræði eru til að knýja fram slíkt mat. Það er jafnréttismál að kostnaður sveitarstjórnarstigsins í landinu sé metinn á sama hátt og ríkisins við lagasetningu og aðrar stjórnvaldsákvarðanir, og leggur sveitarstjórn Þingeyjarsveitar áherslu á að í þessum breytingum verði horft til þess að jafna þessa stöðu milli stjórnsýslustiganna. F.h. sveitarstjórnar Þingeyjarsveitar. Ragnheiður Jóna Ingimarsdóttir, sveitarstjóri.