Fjárlög 2027

Að leggja fram áætlanir um tekjur og gjöld ríkissjóðs árið 2027 og afla heimilda til fjárveitinga, lántöku, ríkisábyrgða og kaupa og sölu eigna.

Lagt er til að draga úr útgjaldavexti um 44,2 milljarða kr. með aðhaldi í rekstri, fækkun starfa og lægri styrkjum til orkuskipta. Hluti ráðstafananna felst í því að nýta ónýttar fjárveitingar, meðal annars vegna nýs Landspítala, án þess að dregið verði úr framkvæmdum.

Tekjuáætlunin byggist meðal annars á hærri bankaskatti og kílómetragjaldi, gjaldtöku á ferðamannastöðum í eigu þjóðarinnar og hærri virðisaukaskatti á baðlón. Gert er ráð fyrir að endurgreiðsla virðisaukaskatts vegna vinnu við íbúðarhúsnæði lækki úr 35% í 20%. Persónuafsláttur og skattþrepamörk yrðu aðeins hækkuð í takt við verðbólgu árið 2027 og ekki yrði bætt við 1% hækkun vegna framleiðnivaxtar líkt og almenna reglan kveður á um. Lögfesta þarf skattabreytingarnar sérstaklega.

Gert er ráð fyrir að útgjöld til heilbrigðismála hækki um 7,2 milljarða kr. að raunvirði. Lagt er til að rekstrarframlög hækki, meðal annars vegna fólksfjölgunar og öldrunar þjóðarinnar, sem og til að stytta biðlista og standa undir rekstri nýrra hjúkrunarrýma, en á móti yrðu fjárveitingar til framkvæmda lægri. Þá er lagt til að framlög til varnartengdra verkefna hækki um 2,4 milljarða kr.