Byggðastofnun

Að færa lög um Byggðastofnun í nútímalegra horf, skýra verkefni stofnunarinnar sem og verkaskiptingu stjórnar og forstjóra og treysta sjálfstæði hennar við eftirlit með póstþjónustu.

Lagt er til að eftirlit Byggðastofnunar með póstþjónustu verði aðskilið frá öðrum verkefnum stofnunarinnar. Við framkvæmd þess yrði stofnunin sjálfstæð gagnvart ráðherra og póstmál heyrðu ekki undir stjórn hennar. Með breytingunni er meðal annars ætlað að bregðast við athugasemdum Eftirlitsstofnunar EFTA um sjálfstæði pósteftirlitsins.

Jafnframt yrði hlutverk Byggðastofnunar í byggðamálum skýrt. Stofnunin meti framvindu sóknaráætlana landshluta og hafi eftirlit með fjárreiðum þeirra, taki þátt í gerð og framkvæmd byggðaáætlunar og fylgist með árangri hennar. Einnig yrði lögð aukin áhersla á rannsóknir á byggðaþróun og samstarf um hana og atvinnuráðgjöf við landshlutasamtök sveitarfélaga og aðra aðila.

Þá er lagt til að forstjóri ákveði innra skipulag stofnunarinnar og ráði staðgengil sinn. Stjórn setji reglur um störf lánanefndar en taki aðeins ákvarðanir um lán og ábyrgðir sem eru umfangsmiklar eða fela í sér nýmæli, vafamál eða stefnumarkandi atriði. Með þessu yrði verkaskiptingin skýrð án efnislegra breytinga á valdheimildum stjórnar. Þagnarskylda næði einnig til utanaðkomandi aðila sem vinna að verkefnum fyrir stofnunina og sett yrðu skýrari ákvæði um vinnslu og öryggi persónuupplýsinga.