Samrunatilkynningar til Samkeppniseftirlitsins

1. Hver var fjöldi tilkynntra samruna til Samkeppniseftirlitsins á árunum 2015–2026 og hver voru afdrif málanna? Svar óskast sundurliðað eftir árum, fjölda mála sem fóru í síðari rannsóknarfasa, fjölda mála sem lauk með skilyrðum eða íhlutunum, fjölda mála sem lauk með ógildingu og meðalmálsmeðferðartíma í hvorum fasa. 2. Hefur ráðuneytið látið greina hvað skýrir aukinn fjölda íhlutana Samkeppniseftirlitsins í samanburði við systurstofnanir á hinum Norðurlöndunum, m.a. með hliðsjón af veltumörkum tilkynningarskyldu? 3. Telur ráðherra þennan mun á íhlutunum eðlilegan eða telur ráðherra ástæðu til að bregðast við? 4. Hversu mörg samrunaáform hafa verið dregin til baka eða fallið niður án formlegrar ákvörðunar Samkeppniseftirlitsins á hverju ári frá 2015–2026, þ.m.t. á stigi forviðræðna? 5. Hvaða andmælaréttar njóta fyrirtæki á stigi forviðræðna og liggja fyrir verklagsreglur um slíkar viðræður innan Samkeppniseftirlitsins? 6. Telur ráðherra það áhyggjuefni ef framkvæmd samrunaeftirlits stendur í vegi fyrir eðlilegum eigendaskiptum í minni rekstri? Ef svo er, telur ráðherra ástæðu til að bregðast við þeirri stöðu?

Orðrétt úr þingskjali 223. Lesa allt skjalið á althingi.is