Hlutafélög og einkahlutafélög

Framkvæmdarreglugerð framkvæmdastjórnarinnar (ESB) 2018/1212 frá 3. september 2018 um lágmarkskröfur varðandi framkvæmd ákvæða tilskipunar Evrópuþingsins og ráðsins 2007/36/EB að því er varðar auðkenningu hluthafa, sendingu upplýsinga og að auðvelda hluthöfum að nýta sér réttindi sín, sem lagt er til að öðlist lagagildi hér á landi, kveður nánar á um sendingu upplýsinga milli félaga, hluthafa og milliliða. Í henni eru meðal annars settar reglur um rafræn og stöðluð snið upplýsinga, svo sem þegar félag óskar eftir upplýsingum um deili á hluthöfum sínum eða sendir fundarboð. Reglugerðin mælir jafnframt fyrir um skamma fresti til að senda tilteknar upplýsingar áfram eftir keðju milliliða. Beiðnir um auðkenningu hluthafa og upplýsingar um fyrirtækjaatburði skal almennt senda áfram í lok sama viðskiptadags en berist þær eftir kl. 16 á viðskiptadegi skal senda þær eigi síðar en kl. 10 næsta viðskiptadag.

Löggjöf á Norðurlöndum

Í Danmörku, Finnlandi, Noregi og Svíþjóð gilda reglur um starfskjarastefnu stjórnenda í skráðum félögum. Í öllum löndunum ber að leggja stefnuna fyrir hluthafafund þegar gerðar eru á henni verulegar breytingar og að minnsta kosti á fjögurra ára fresti. Ákvæði þessa efnis er að finna í 139. gr. danskra laga um hlutafélög og einkahlutafélög (bekendtgørelse af lov om aktie- og anpartsselskaber (selskabsloven), LBK nr 331 af 20/03/2025), í 3. gr. a í 5. kafla finnskra hlutafélagalaga (aktiebolagslag, 624/2006), í 16. gr. a í 6. kafla norskra laga um almenningshlutafélög (lov om allmennaksjeselskaper (allmennaksjeloven), LOV-1997-06-13-45) og í 61. gr. 7. kafla og 51. gr. 8. kafla sænskra hlutafélagalaga (aktiebolagslag, 2005:551). Í Danmörku, Noregi og Svíþjóð tekur hluthafafundur ákvörðun um stefnuna en í Finnlandi er ákvörðun hans ráðgefandi.

Reglur um veruleg viðskipti við tengda aðila eru hins vegar ólíkari milli landanna. Í Danmörku skal æðsta stjórn félags samþykkja slík viðskipti fyrir fram auk þess sem birta ber opinberlega upplýsingar um tiltekin meiriháttar viðskipti, sbr. 139. gr. d í lögum um hlutafélög og einkahlutafélög. Í Finnlandi gilda sérstakar vanhæfisreglur um hluthafa og stjórnarmenn sem tengjast slíkum viðskiptum og skylt er að birta veruleg viðskipti við tengda aðila opinberlega, sbr. 14. gr. a í 5. kafla og 4. gr. a í 6. kafla hlutafélagalaga og 1. gr. a í 8. kafla laga um verðbréfamarkaðinn (värdepappersmarknadslag, 746/2012).

Í Noregi þurfa veruleg viðskipti skráðs félags við tengdan aðila samþykki hluthafafundar ef verðmæti þeirra fer yfir 2,5% af niðurstöðutölu efnahagsreiknings samkvæmt síðasta samþykkta ársreikningi og birta skal upplýsingar um þau opinberlega, sbr. 11., 13. og 15. gr. 3. kafla í lögum um almenningshlutafélög. Í Svíþjóð þarf hluthafafundur að samþykkja viðskipti sem nema að minnsta kosti einni milljón sænskra króna og jafnframt 1% af virði félagsins. Við ákvörðun hluthafafundar eru hlutabréf í eigu tengda aðilans ekki tekin með, sbr. 1.-2. gr. og 7.-8. gr. 16. kafla a í hlutafélagalögum.