Útreikningur veiðigjalds

1. Var með setningu laga nr. 55/2025 ætlunin að miða veiðigjald þorsks og ýsu við vegið meðalverð slægðs og óslægðs afla af fisk mörkuðum eða af öllum afla, óháð söluleið? 2. Ef veiðigjald miðast við meðalverð afla af fiskmörkuðum, hvernig er tryggt að slíkt verðviðmið endurspegli með málefnalegum hætti raunverulegt markaðsverð aflans í heild, í ljósi þess að meiri hluti aflans er seldur utan fiskmarkaða og að í 5. gr. laga um veiðigjald, nr. 145/2018, er kveðið á um að deila skuli niðurstöðu útreiknings með „öllu aflamagni nytjastofnsins“? 3. Hefur verið tekið tillit til þess að fiskmarkaðsverð er brúttóverð sem felur í sér sölukostnað? Ef svo er, með hvaða hætti er leiðrétt fyrir þeim kostnaði þannig að sölukostnaður teljist ekki til tekna við ákvörðun aflaverðmætis og reiknistofns veiðigjalds? 4. Telur ráðherra að sú aðferð sem nú er beitt við ákvörðun verðforsendna veiðigjalds samræmist ákvæðum laga um að veiðigjald nemi 33% af afkomu, sérstaklega með hliðsjón af því að tekjuliðir eru metnir með nýju verðviðmiði, en kostnaðarliðir og kostnaðardreifing byggjast á öðrum forsendum? 5. Telur ráðherra að það verðviðmið sem nú er lagt til grundvallar við ákvörðun aflaverðmætis gefi raunhæfa mynd af verðmæti heildaraflans, í ljósi þess að fiskmarkaðsverð myndast á grundvelli takmarkaðs hluta aflans (um 16% af þorski og 37% af ýsu) og að verðmyndun yrði að öllum líkindum önnur ef allur aflinn færi um sama markað? …

Orðrétt úr þingskjali 95, stytt. Lesa allt skjalið á althingi.is